麥潔文下個月喺旺角麥花臣場館舉行音樂會，老公江華做表演嘉賓，前晚佢哋喺九龍灣綵排，一齊練歌。合照時，江華從後攬住老婆，仲話︰「收收條腰吖！」之後影單人相時，江華笑老婆：「你行開啦，單人相呀，都唔嗅米氣嘅！」

之後麥潔文同江華夫妻檔合唱當年同張國榮嘅合唱歌《Miracle》，兩個深情對望好投入。唱完，江華窒老婆忘記歌詞，麥潔文就話開騷時要用字幕機，江華再寸佢︰「小鳳姐呀，我都唔見有字幕機㗎！你向人學習啦。」

爆老公恨唱歌

麥潔文接受訪問時，大讚老公風趣，但江華就投訴經常俾老婆窒，麥潔文反擊：「你一入嚟就窒我喎。」提到叫老婆「收收條腰」，江華反駁：「頭先我話收腰，係同自己講，收咗個人會挺啲，唔使寒住個背，佢就誤解咗，以為我叫佢收腰。」麥潔文話：「我講嘢唔夠佢叻。」江華仲話唔想老婆減肥︰「佢𠵱家已經120幾磅，如果再減，我驚佢太索，無謂啦，我驚㗎，我越嚟越冇自信。」麥潔文就向老公派定心丸：「驚咩呀？我都冇人吼。」'

麥潔文又踢爆老公一直恨做歌星，江華笑住反擊：「咪玩啦你，𠵱家先恨做歌星，係都30年前啦，不過咁，我覺得唱歌開心過拍戲。」之後佢望一望老婆發問︰「你做乜嘢越企越後？唔好以為企喺我後面會瘦啲喎！」麥潔文話：「我冇呀！」兩公婆喺現場大耍花槍。'
撰文：馮仁昭