【無敵兩仔乸】林作媽媽直播講財困:阿仔話可以做鴨幫個老母
麥明詩林作賣樓套現
前大律師林作唔做律師,轉投教育界同演藝界,廣告拍咗,event出咗,但係收入唔知係咪「未如理想」,佢早前喺Instagram開po,話自己「屋企最近環境急轉直下,已經在蘊釀出售層所謂豪宅。」(新聞連結: http://bit.ly/2hocEbD ),其後更引嚟經紀瘋狂致電,搞到林作大嗌:「唔會再覆啦!」(新聞連結: http://bit.ly/2yfydWm )
有指林作有意出售嗰個位於半山嘅麥當勞道3,400呎複式豪宅單位,係林作媽媽1年前豪擲6,500萬買入,現時市值已逾8千萬。(新聞連結: http://bit.ly/2kiUP0S )當時有指林作媽媽打算買嚟留俾林作同麥明詩作新婚愛巢之用,不過,如今人事全非……
今日林作就喺facebook度突然開po話:「今晚發現媽媽返咗嚟,我決定一陣捉佢喺度做live,公審吓究竟佢依家財政狀況如何,同埋我作為裙腳仔嘅未來生計。」好喇,咁到底林氏母子會講啲乜呢?
長約10分鐘左右嘅直播,由林作母子喺度玩狗開始,佢話媽媽啱啱喺北京返香港,而林媽媽就多次講:「多謝個仔擺我上枱。」然後佢話要講清楚自己嘅財政狀況問題,佢話:「本身係遇到啲問題,但係阿仔(林作)話可以做鴨(男妓)幫個老母,咁我梗係高興啦!」林作聞言即係鏡頭後重覆:「阿仔做鴨你高興喎!天下真係冇咩你咁嘅老母呀!」
之後林媽媽話,今次返港唔使賣樓,因為有個仔幫佢還債,仲認喺北京撲到水,以及「加埋阿仔做鴨,咁就夠啦!」林媽媽仲話自己喺北京返嚟即刻做咗個facial,林作乘機讚阿媽靚女,林媽媽就話:「你睇我心情幾好,邊似財困?」
好,吹完一輪水,入「正題」喇,咁到底係咪要賣樓呢?
林媽媽話:「唔賣住先,等再緊手啲手先。」之後佢再話:「老老實實,邊個都需要資金周轉,所以你生生性性唔好大使。」林媽媽再打蛇隨棍上,燒到林作嗰疊,講到明賣樓係視乎阿仔嘅姻緣,林媽媽話:「又冇女喎,又結唔到婚,我都想湊孫。」、「有女返入嚟,咪唔使賣樓。」、「冇女我就要賣屋㗎喇,只可以咁樣。」,重點係後面呢句,由林媽媽親口講出:「如果三妻四妾呢,就隔籬再買多幢!」難怪林作都話個直播,其實係公開徵友……
林媽媽重申自己現時財政狀況OK,屋就唔賣住,睇吓下年林作可唔可以搵到女(友),先至再決定,佢講講吓仲講到拜年咁,林作就話自己好有信心下年一定搵到女友。
更多娛聞,喺晒《娛果》
http://fb.com/appledailyent