當年今日

豐田Raum新型號極速登場

蘋果日報 2003/05/17 00:00


如果你係豐田Fans的話,相信對Raum呢個車系唔會感到陌生;然而,最近廠方喺日本本土市場推出新款型號。新車無論造型、車廂配搭及性能表現,皆予人有耳目一新之感,相信定能惹來不少用家垂青呢!
新款Raum造型可謂極具吸引力,而車首設計重帶有點同廠ist車系嘅味道,就連一雙望落頗有神氣嘅頭燈組合,更能於晚間行車時為你提供充裕嘅照明呢!左右雙趟門配搭,亦能方便後排乘客上落車㖭!至於車廂布局方面,亦畀到人有一份新鮮感,除空間寬敞闊落,匹配上承托力極高嘅座椅,絕能為車上乘客營造出一個舒適嘅乘車環境;另外,經過重新設計嘅中控台配搭,不單止設備齊全易用,頂端嘅表板布局亦見清晰易讀呢!新車以一台1.5公升直4VVT-i偈作動力核心,馬力輸出為109匹,用以驅動此車可謂綽綽有餘。唔知香港嘅車迷,有無機會同佢見面呢?