孫慧雪子宮有8cm朱古力肌瘤 懷孕初期曾下體滴血急打安胎針
孫慧雪張美妮關心妍
都市人生活緊張,要有BB也不是一件容易的事,關心妍(Jade)、張美妮和孫慧雪最近在網台節目《靚媽圍爐》分享自己艱辛懷孕過程。孫慧雪在35歲時誕下囝囝Riley,如今囝囝已經3歲半大,但原來當年阿雪的子宮有一個8cm大的朱古力肌瘤,懷孕絕非易事,「醫生用咗好多方法,幫我打過停經針、排卵針,懷胎過程好似坐過山車咁。陀B初期有日去廁所時發現下體滴血,老公即刻陪我去醫院,好彩醫生幫我注射黃體酮針藥(俗稱安胎針),再配合全面休息先保得住個胎。」她更自揭閨房事,一臉尷尬說:「做完之後唔可以落床,對腳要向上,要keep住幾個字,最爆係講呢樣嘢畀我聽嘅人係我阿嫲囉!我一結婚我阿嫲就同我講一定要記得呀,佢捉住我,我以為有咩緊要嘢要同我交代,結果佢係同我講對腳記得要向上!」
關心妍當年給嫁老公後,一直養好身子準備迎接胎兒來臨,怎料一等就等足七年,她在節目中眼濕濕說:「乜都試過晒,由好期待到不停搵方法都唔得,再漸漸連身邊熟朋友都唔敢喺我哋面前提起,仲已經預備好領養嘅心情。」關心妍透露因為吃中藥補身致心律不正,又試過帶住排卵針到越南登台,助手們眼見Jade神情自若一針拮落瘀黑的肚皮已嚇到喊。幸最後Jade如願懷孕,誕下囡囡楊榮心,並叮囑各位想懷孕的女士一定要暖宮;而美妮就分享與老公在浪漫環境下製造囡囡,當中配合食療才可一擊即中!
孫慧雪的子宮有一個8cm大的朱古力肌瘤,懷孕絕非易事。(影片截圖)
-----------------------------
-----------------------------