水貨圍城。上水、屯門、沙田、元朗，今日大批市民再聚集上水同屯門，反水貨客。八旬倪匡之前接受報章訪問時，被問及點睇光復行動，佢就話:「做法毫無目的，簡直無賴。」問倪匡係咪唔贊成行動？佢又話喎:「贊成!有機會當然做，唔知幾過癮。條魚俾人放喺砧板上，都會掙扎跳幾下啦！」(新聞連結: http://bit.ly/1wfJPlr )所以今日上水好多魚紮紮跳。

網民成日發夢都想佢做香港特首嘅發哥周潤發又點睇？佢話:「呢個係政府政策嘅問題!」點解大家發開口夢都想佢做特首？因為佢講人話囉。

不過，發哥今日唔係去光復上水，而係日前行山嗰陣俾傳媒捕獲，傾咗幾句，當中講到水貨圍城。該報道問及發哥點睇水貨客同市民嘅矛盾？發哥就話:「我諗升斗市民都會覺得生活環境度度都有啲障礙嘅。」問是否贊成反水貨客？發哥話:「最主要係政府政策問題！」

咁市民又可以做啲咩呢？自己香港自己救，發哥就無奈地謂:「冇計0架！政府唔做嘢，真係冇計！」問及可覺得光復行動太激？佢話：「雙方都應該克制，政府去解決就最好！」

發哥又話，水貨客影響市民日常生活，但當中未必盡是水貨客:「有啲係正常落嚟玩、買嘢，但係溝咗咁多人，都唔知邊班打邊班！」發哥又謂：「你見到新聞影片（光復行動）咁激烈，就知大家係有不滿。」

每次反水貨客行動，慈母例必用武力，又出棍又噴椒仲拉人。錯嘅永遠係市民，啱嘅永遠係政府同既得利益者。問題解決方案，佢哋話，要包容，但發哥一擊就擊中要害，問題癥結就係呢個政府唔做嘢去解決問題，就好似佔領期間，林鄭一味叫學生同市民「袋住先」，發哥直線抽擊:「政府喺呢個議題上(普選)，成日叫我哋香港人袋住先。點解唔可以叫政府調番轉頭袋住先？」點解？

相關新聞:
【光復上水】掃貨深圳女：睇你哋香港有幾多人失業
http://bit.ly/1EuycIJ

【發哥撐學生】斥梁振英只識迴避：點解政府唔可以袋住先？
http://bit.ly/1vxa7wh