保釣行動委員會主席陳妙德指，正籌措資金及招募人手，計劃下周出發前往釣魚台，但為免特區政府難做，他們將低調出發，「除基本四名船員外，大約得兩至三個成員去，我哋亦會準備魚網魚竿，費事咁張揚」。此前，保釣船「釣魚台二號」被神秘市民投訴有鼠患，食環署將於今日下午上船稽查。陳妙德認為事件非常巧合，「我都唔希望係政治打壓，但係個時間夾都冇咁準」。
釣魚台二號登記船主羅就質疑是官方打壓，「附近啲船家話幾十年都未聽過會上船查鼠患，隔籬大陸船泊岸一日就走，有老鼠喺嗰邊走上船又有幾出奇」？他指出正就出航作準備，「最多咪買個老鼠籠」！
香港人權監察亦質疑查鼠患是政府濫權藉口，旨在阻撓保釣人士出海。食環署稱，署方無權扣留船隻。若船長要求更改視察時間，可另作安排。
本報記者