今日明明係亞姐張家瑩兩家餐廳開幕大喜日子,同場仲有香港觀眾好耐冇見過踲展昭展大人——何家勁。但係呢,今日有份到賀嘅亞視執董葉家寶就搶了不少風頭,先係回應有報道指樂易玲轉投亞視時,自爆曾經「坐過620」,跟手仲講嘢明剃無綫眼眉添!
葉家寶話,知道林峯唔續約無綫,即刻搵佢做亞姐評判,佢話:「我哋打緊好多人主意,有同林峯通過電話,佢話當日唔喺香港,我哋考慮邀請佢做評判,為咗佢,我哋可以改期。」嘩,咁大個騷可以為咗一個評判(唔係嘉賓喎)而改期,可想而知亞視何其有誠意,亦有幾想林峯可以出席。
葉家寶又話,會用唔同形式同不同藝人合作,邀請佢哋加入,而亞視8月底會同廣西衛視、PPTV、中移動,合作咗200集處境劇《女神辦公室》,會以接近同步聯播推行。中港聯合再進一步?
至於同場嘅顏子菲,就話6月27號已經約滿亞視,現階段計劃先休息一段時間,顏子菲話:「身體唔好,可能因為壓力大,經常偏頭痛、反胃、失眠,休息之後會諗吓自己有啲咩可以做。」
0依家忙於搞健康食品生意嘅何家勁,今日專程喺內地趕返香港撐家瑩場,何家勁話過去兩年太忙,未有時間拍劇,佢話:「金超群(包青天)有打俾我,叫我拍《白髮青天》,我話如果開劇要早啲通知,暫時唔拍住。」