中化化肥（297）貴為祖國化肥大哥大，預測PE平過同級行家之餘，PB更平盡全場。集團八年插咗八成半，單係揸住全國最大鉀肥商鹽湖股份（深：000792）24%權益市值，已經超過中化肥本身市值。中化肥索到爆！
啱啱9月，中化肥完成收購母系所揸15%鹽湖權益，總權益近24%，等值約108億港元，超過成間中化市值90億元！而中化肥呢次收購鹽湖，每股作價約19.6港元，鹽湖現價約28.6港元，中化肥兼即時享受鹽湖股價肥仔增值22億元。

等住俾阿媽泵大

仲要咁睇，中化系係改革大熱，中化集團講明，今年底會同發改委、國資委密切溝通，明年初至年中形成方案。中化肥早着一步，獲阿媽眷顧，以折讓近28%購入鹽湖股權，憧憬俾阿媽再泵大。
中化肥今年上半年盈利大增1.5倍，到3.4億元人仔，超過上年全年盈利2.4億元人仔。場內專業評估，中化肥翻身，今、明、後三年keep住增長，EPS分別係8.6仙、0.115元、0.135元，預測15.2倍、11.3倍同9.7倍。上邊鹽湖明年同後年24倍同21倍PE。又中化肥第二大股東、加拿大巨無霸Potash（揸中化肥22%）市值過千億港元，係中化肥市值14倍，嚟緊兩年12.4倍同11.4倍PE。
仲吸引係，中化肥明年預估PB得0.52倍，鹽湖明年1.94倍、Potash 1.9倍，又中港行家金正大（深：002470）3.3倍、世紀陽光（509）1.4倍，中國心連心化肥（1866）0.87倍。中化肥PB平霸！當中化肥追番最近磅心連心，現價1.32元都講緊要升67%到2.2元。

錢雋
細價股專家
本欄逢周一、三、五刊出