李亞鵬同王菲嘅愛女李嫣天生兔唇，兩夫婦對女兒嘅病情憂心忡忡。幸好李嫣赴美接受手術後已漸露曙光，李亞鵬日前喺內地接受節目《可凡傾聽》訪問，大談佢同王菲喺李嫣出生後嘅心路歷程，馮仁昭聽完之後都好感動。

去年5月王菲剖腹誕下李嫣，之後李亞鵬去睇囡囡，見佢好乖好安靜，於是急急腳返去探望仍未脫離危險期嘅王菲，點知李嫣忽然大喊，李亞鵬憶述當時情況：「我對女兒說，你要相信爸爸，你一定沒問題。我剛說完，旁邊的醫生和護士全哭了。」李亞鵬仲話傾家蕩產都要救愛女。
李嫣出院後，全家着手秘密安排佢去美國就醫，當時已有傳言話李嫣有兔唇，為李亞鵬兩公婆帶來唔少壓力。直至愛女接受手術之後，李亞鵬先喺網誌上公開呢件事，仲話：「她唇裂得非常大，讓我覺得她笑得比我們開心。」不過李嫣第一次手術成功後，兩夫婦竟然要睇足10日先適應。

李亞鵬話李嫣之後仲要接受口腔矯正手術，佢話：「我們當時在美國兩所醫院做體檢，她是幾萬名小孩中身高和體重都第一名，很結實。」
為免大女竇靖童（王菲與前夫竇唯所生女兒）以為父母偏心，李亞鵬特別為童童做心理輔導，話畀佢知李嫣生病，點知童童問：「這個病可以治好嗎？」李亞鵬話：「可以治好。」童童就話：「我還以為多大的事呢！」李亞鵬話童童𠵱家叫佢做爸爸，仲話：「其實小孩比我們簡單純真，她一點不覺得有甚麼問題。」