陳木勝導演、洪金寶動作導演，劉青雲、古天樂、彭于晏、吳京等主演嘅動作片《危城》，8月暑假至有得睇，不過電影角色嘅海報就曝光喇！一班演員拎住自己最拿手嘅武器，包括浪人造型嘅彭于晏扛大刀，手拎小刀、青雲玩長鞭，好Man呀!戲中殺無赦嘅古仔就施施然拎住把槍，而用長纓槍嘅吳京就扮晒cool咁。

另一組角色海報，洪天照就打到飛起，多年冇拍動作戲嘅廖啟智都有義勇雙全一面，至於姜皓文喺戲中演麵館老闆阿牛，手執鑊鏟嘅佢講笑話：「鑊鏟係我搵食工具，亦都係我嘅防衛武器，幾特別㗎！」而真係cool嘅吳廷燁就繼續做佢最拿手嘅奸角。

《危城》喺紹興景區取景，將原先係大沼澤，特登用半年時間，搭建一個二萬平方公尺嘅普城場景，因搭建時係雨季，劇組加建咗天幕，方便搭城景同拍戲。不過因為連場暴雨，劇組多次面臨停工。普城搭建完成後，青雲就話：「唔敢相信係自己人搭出嚟。」而當地旅遊部門考慮緊將埸景保留作為旅遊景點。

此外，為配合電影8月上映，電影公司下個月搞個「陳木勝動作電影展」嘅活動，展期一個月，播出多部陳木勝執導嘅作品，當中包括《三岔口》、《男兒本色》、《掃毒》，新作《危城》就會為動作展結尾。