當年今日
關於我們

【毛毛分獎禮】大贏家方健儀 力撐二次創作:創意係普世價值

蘋果日報 2016/01/12 06:00

蘋果香港二次創作即時方健儀普世價值毛記分獎禮

方健儀轉型成功,由新聞主播跳入舞台,歌影視播瓣瓣都有涉獵,噚晚方健儀更喺「毛記電視分獎禮」擸咗三個獎,當中撼贏何韻詩膺「香港區最受歡迎女歌星」,成為大贏家。

問到係咪入行後首個音樂獎項?佢笑稱:「都係0架,以前唔係呢個專業。上次係玩票性質,朋友話我好勁,未加入樂壇就攞獎。」而方健儀唱《中東與綜》吐字清晰,問到歌詞係咪好翹口?佢話:「係呀,冇錯,落咗一番苦功,唱呢類型歌曲要催眠自己,你要抹走原唱歌詞,我上網搵純音樂練習,啲舊歌詞好深入民心,如果仲記住,唱唱下要shake返舊嗰首,都幾得意,考我急口令,結果都好彩過關。」

方健儀笑言過去半年都不斷loop呢首歌,問老公有冇聽?佢笑稱:「有,虐待佢,好慘。」

如果「網絡23條」二讀通過的話,呢個分獎禮明年分分鐘冇得玩,問佢怕唔怕冇第二屆或者會有限制呢?方健儀則說:「唔怕,創意係普世價值,相信一路會存在。」佢又感謝網民愛戴:「以前可能見得多,隔幾年再見有種集體回憶...有人真係以為我係100毛僱員,好感恩好多人支持。」

講到成為分獎禮大贏家?方健儀坦言:「真係始料不及,可以分到三個獎好犀利,以為分到一個獎,香港區女歌星真係諗唔到。」問到會否慶祝?佢話可能會,又話老公好開心,笑到見牙唔見眼。