聖誕氣氛愈嚟愈濃，咁高興嘅節日，發展商自不然會為樓盤搞搞新意思，令買家感受一吓節日色彩。恒基大角嘴港灣豪庭，就係芸芸樓盤中，最具冬日氣氛嘅新盤，巨型售樓處已經添上新裝。發展商將整個售樓處重新包裝，予人煥然一新感覺。場外一大片空地鋪湖水藍嘅裝飾，有如畀海洋包圍，相信係配合個盤望到海景嘅主題有關。外牆又以白色布置，好有落雪feel，重掛咗個大時鐘，唔通係準備大除夕倒數用？
講開又講，呢個盤舊年又係喺聖誕節開盤，首次發售重賣到清晨五點幾。聽講，一期五百多個現樓單位已準備就緒，1座樓王有一層整晒做示範單位，月內就開賣，咁啱又係聖誕節，名副其實嘅聖誕盤！
中記慶功唐秉正最high
港島兩個矚目新盤，西半山寶珊道一號同上環帝后華庭，銷售已告一段落，代理砌完一輪，開始唞番吓，中原前晚就一次過為兩個盤同時搞慶功宴，地點係中環Queen'sClub，有三百幾人出席，據聞今次總共使咗約五萬蚊（未包代理自己帶嘅酒水）。聽講中記董事唐秉正（圖二右四）（Terence）重飲大咗，要同事扶佢返屋企㖭。
Terence對蘭西講，佢哋總共做咗約七宗寶珊道一號，收到超過二百萬佣，而帝后華庭重勁，四百幾宗，佣金過千二萬。難怪嗰晚咁high啦。
另外，中記代理嘅太子別樹華軒，聽講發展商新世界將佣金調高到1.75%。
試價廣告須業主同意
二手業主賣樓，絕大部份都搵代理放售，由於叫價可能同市場承接價有啲距離，若果淨係登叫價，肯定冇人理，所以代理就將有可能接近成交嘅銀碼登埋一齊，等有興趣買家去「試價」。
咁嘅做法反應都係麻麻，最近有代理行更進一步，索性只登試價。嗰間代理行重話已問准地產代理監管局，又認為個價業主有可能接受到至登，若有買家問盤，就會講番業主嘅要求（即係業主叫價）。
為求穩陣，蘭西問過地監局，佢哋回覆話好似「可試價＄…」、「可$…」或者係「試＄…」呢啲其實都係違規，不過，假如徵得業主同意就冇事。咁若果見到報紙有好似上述嘅廣告，代表乜嘢大家就明啦！
帝后遲遲唔退票
掀起一輪炒賣熱潮嘅上環帝后華庭，由前期推廣到通宵賣樓，搞咗成個多月，唔少市民畀個盤嘅氣勢吸引，搵代理幫手入票，諗住霸頭位，無蝕底，揀番個單位。
個盤最近賣晒，但之前收到嘅過萬張票，就一直未退票。本報收到讀者投訴，話個盤早係11月底就收票，一拖再拖到今個月8號先抽籤，中前籌嘅，居然買唔到最平嘅首批單位，重到今日都未收到退票，搞到無錢過冬咁話。
發展商就話今個禮拜六之前，會搞掂退票手續，細節交由律師樓處理。