王祖藍、毛舜筠（毛毛）、王菀之同李亞男前晚喺將軍澳一間酒店為電影《你咪理，我愛你！》舉行煞科宴，呢套戲係祖藍首次執導，毛姐喺戲中再同曾志偉做兩公婆，祖藍笑言：「今次已經係佢哋第七次做夫妻，其中毛毛仲有場戲要裝個50G嘅上圍，又唱又跳，佢話因為上圍太勁，成日撞到人。」

李亞男力推

講到出年賀歲片多對手，祖藍話：「對手係好多，不過唔緊要啦，因為香港幾十年都冇一套廣東話嘅歌舞片。」問到廣東片會唔會喺內地上映，佢就話：「未必喺新年檔上映，我想推廣東話，所以想用原聲加字幕喺內地上，加上呢套係歌舞加兩性喜劇，所以喺內地上嘅難度都幾大。」佢又話想做好本土嘅香港電影，所以都唔係好擔心內地票房。腹大便便嘅李亞男狂幫老公硬銷：「啲演員做得好好，我夠膽講今次一定好笑，有冇聽過毛姐唱歌，就算連Sammi（鄭秀文）都做埋師奶。今次有成60個演員，以前咁多人客串都係過鏡，今次就個個都有故事。
撰文：馮仁昭