導演陳果今日到商台接受訪問，宣傳嚟緊7.1重新上映經數碼修復嘅《香港製造》，陳果話呢排都做咗好多訪問，問佢以前上映嘅時候無咁多人留意到？佢笑話：「以前都有唔少訪問，不過係事後嘅事。」

講番呢套20年前嘅作品，佢話：「呢套電影好奇怪，20年前香港嘅年青人對政治對環境無咩感覺，眨眼20年當年冇感覺嘅年青人依家睇番，佢哋竟然話會邊睇邊喊。」陳果仲講笑話 ：「我都覺得自己好勁。」

咁對《香港製造》再次上映有啲咩期望？陳果話：「希望新一代嘅會鍾意啦，有啲觀眾可能喺網上或者DVD睇過，但始終喺大銀幕睇有第二種感覺。」

講到《紅van》續集究竟幾時會開拍？佢話：「仲未搵到一個適合嘅Timing去做，究竟係咪會講好多社會議題定還是純商業片？加上電影有好多特技同埋動作成本會好貴，又唔知上唔上到大陸，或者再睇五年啦。」點解要五年咁耐？陳果話：「咁o依家林鄭上任，你都要俾時間睇林鄭做一排睇下點先至再決定。」

至於近期忙緊咩？陳果透露：「呢排都係搞緊《九龍不敗》後期，希望今年內可以上到啦。」佢直言呢套電影好主流，自己Fans們可能會唔鍾意，佢話：「唔做唔通乞食咩？我又冇其他嘢做。」係咪為搵食妥協好多，包括電影類型？佢解釋：「作為一個導演，其實咩題材嘅戲都冇所謂嘅，有咩咪拍咩囉。」