黃色暴雨下，香港好多人嘅心情同天色一樣咁暗淡。眼見民主派大撕裂，眼見英格蘭因為球證世紀錯判潰不成軍，心都實埋。有民主黨選民兼英格蘭球迷就喺網上留言：「為甚麼所有霉運，近日都給我遇上。」
已經退出民主黨嘅鄭家富冇晒心機。阿富一向係英格蘭擁躉，日前宣佈退黨之時，都話好彩英格蘭贏咗波令心情舒服番啲；點知事隔幾日，英格蘭就慘敗德國腳下要執包袱走人。雪上加霜嘅阿富噚日話好傷心，似乎英格蘭輸波同佢離開民主黨，都係佢生命中嘅最痛。

輸波都唔可以怪晒人

早前話過寧願英格蘭捧唔到世界盃、都唔希望阿富退黨嘅張文光亦好無奈，阿富呢鋪真係唔走唔得！張文光噚日眼定定睇足全場，同好多人一樣谷氣收場。一谷球證誤判令英格蘭被迫採取全攻策略，後防空虛下德國隊不時有機可乘。二谷就當然係英格蘭確實踢得唔好，所以喺落後之下都冇乜能力反敗為勝，半場已經返魂乏術，輸波都唔可以完全怪晒人。
至於豪花幾百蚊買咗件英格蘭波衫着住捧場嘅高達，雖然英格蘭賽前已被看低一線，但冇減低佢捧英熱情，就算英格蘭落後一球時，佢仍然覺得有得追，但當個球證將林柏特嘅入球判為無效，佢就火都嚟埋，嗰一刻即時想掟爛個電視機咁滯。

要同英格蘭一刀兩斷

好多英格蘭球迷繼續喺網上哭波喪，有人話對英格蘭就好似對民主黨一樣，已經死心，要同英格蘭一刀兩斷。有人就估計，自己有生之年都唔會見到英格蘭喺世界盃捧盃，正如唔會喺有生之年見到香港有真普選一樣。
八方覺得，英格蘭嘅處境點都好過民主黨少少，歸咎個球證錯判，都仲有人同情你，歸咎人哋講粗口而唔面對問題核心，只會越走越遠。民主黨要員呢幾日喺公開場合嘅發言，似乎集中反擊社民連同佢哋嘅支持者，其實佢哋明唔明，佢哋至今仍然未正正式式、詳詳細細、誠誠懇懇咁，向佢哋嘅選民同支持者交代清楚今次嘅立場轉變。

mailto:[email protected]