噚日發表完「食屎狗」論之後，志偉今日風騷現身馬場，為愛駒「卡加大師」打氣。好友譚詠麟、彭健新同陳百祥等都有到場力撐。問志偉講完食屎狗論，有否收到電話跟進？佢笑笑口話：「冇，做東華做到好夜。」

日前爆出嘅「掌摑風波」已經搞到滿城風雨，今日梁漢文、阿叻同吳君如等已經分別出聲撐志偉，阿倫仲話志偉當時可能只係唱緊《輕撫你的臉》。點知佢一到場，就喺眾目睽睽下作狀摑志偉三巴，呢個「打招呼」方式真係特別。唔知係咪因為咁，結果搞到「卡加大師」只係得第三。之後阿倫又作狀摑彭健新，係咪撩交嗌先？