【師兄考慮執執?】祖兒台上「示愛」 狂讚李榮浩眼細有才華
演唱會容祖兒李榮浩習慣失戀
楊丞琳男友、大陸歌手李榮浩噚晚首次喺紅館舉行演唱會,胡彥斌、莫文蔚、黃偉文(Wyman)等捧場,至於女友就因為要喺大陸拍戲冇嚟捧場。李榮浩一出場就用廣東話同觀眾打招呼,當然唔少得要同「山頂嘅朋友」問好,不過佢發音唔準變咗「3樓嘅朋友」。
李榮浩今次特別學咗4首廣東歌,包括《下一站天后》、《小城故事》、《煞科》同《習慣失戀》,佢唱完第一首之後就問觀眾:「我勁唔勁呀?」但又講到變成「我驚唔驚呀?」搞到全場爆笑。之後唱《習慣失戀》時,呢首歌嘅原唱者容祖兒升埋上台,同李榮浩一齊合唱,不過當李榮浩一副深情樣望住祖兒時,祖兒竟然忍唔到笑。
唱完歌之後,祖兒忽然話:「不如我哋握個手。」結果兩個人好似好生保咁握手,李榮浩解釋:「我們並不認識,只在一、兩次的演出後台見過面。」祖兒接住話自己做嘉賓有兩種條件,一係同對方好熟,二就係自己好欣賞對方。
祖兒仲講笑話好鍾意眼睛細嘅男仔,感覺特別迷人,李榮浩即自嘲:「沒有眼睛比我更小。」祖兒繼續賣口乖讚對方有才華、對女友專一,讚完一輪開口要酬勞:「你真是很有才華,人又聰明,說廣東話又標準,我想你寫首歌給我。」李榮浩一口答應,祖兒再話:「我以為和Wyman是合作最多的,現在給你超越,你要寫兩首歌,一首Wyman寫詞,一首你寫,我的朋友李克勤也想問你寫歌,不過你要先為我寫。」
完騷之後,李榮浩接受訪問,講到特別練嘅4首廣東歌,佢話:「之前要不停的聽那些歌曲,從新編曲之後,開始練習了一星期,咬字最困難,因為廣東話有很多音節。」佢又話上次開騷唱咗四大天王嘅歌,所以今次就揀咗天后嘅歌唱,自評表演有80分。