本身係搬運工人嘅日本拳手木村翔，早前K.O.中國拳王鄒市明，搶走對方嘅蠅量級金腰帶，一戰成名。據美國拳擊網站FightNews透露，鄒市明申請重賽但俾WBO駁回；有消息指WBO要求木村翔同另一日本拳手、現年33歲嘅前WBC世界冠軍五十嵐俊幸打衞冕戰。

28歲嘅木村翔表示：「無論對手是邊個都冇所謂，我已經好耐冇喺日本國內比賽，能夠喺主場作戰係一件令人興奮嘅事。五十嵐係前世界王者、有實力嘅選手，所以今次係我真正測試實力嘅機會。當比賽正式確認後，我會睇佢嘅比賽影片進行研究。」