旺角街頭又成為MMA擂台，上星期四（5日）一個多雲、有大雨嘅日子，接近中午12點嗰陣，有巿民揸車經過旺角豉油街近花園街停燈位，點知見到兩個男人喺馬路邊大打出手。着T恤牛仔褲孭背囊、拎住把遮嘅四眼仔，同着紅衫短褲踢拖鬍鬚佬，唔知為乜嘈起上嚟，兩個人拉扯推撞。
停燈嘅時間短短19秒，短片開始見到身形高高瘦瘦嘅四眼仔，用右手拍紅衫男塊臉，紅衫男就一手捉住四眼仔隻手，然後兜巴星還擊，四眼仔眼鏡都飛埋落地，睇得出紅衫男一啲都冇留力。兩個人拉拉扯扯，四眼仔一度推跌對方，又用手上把遮扑打佢。
但紅衫男好快起番身，更雙手捉實四眼仔兩個膝頭，一手抱起佢就將佢撻落地，再連環五搥狂中四眼仔塊臉，小記睇到呢度都覺得場面好血腥，四眼仔爆晒缸似乎無力還擊，好似冇知覺咁攤咗喺地，但係紅衫男仲唔收手，起身竟然再大腳踩落四眼仔心口，四眼仔一的反應都冇，紅衫男先慢慢行去着番一隻甩咗嘅拖鞋。

途人報警　入廠救治後出院

短片拍到𠵱度就完咗，因為拍攝者要開車走。兩男打鬥嗰時街上面都有啲途人行過，但大家都係眼望望，冇人敢上去幫手。有關片段噚日係網上熱播，好多網民都擔心四眼仔會唔會俾人打死。
《蘋果》就向警方查詢當日有冇人報過警，警方回覆話，嗰日上晝11點53分有人報警話一個男人喺豉油街同花園街交界俾人襲擊。阿Sir到場發現一名33歲姓王男子頭部受傷，清醒送院救治。警方同日喺旺角區拉咗一個38歲姓陳男人，涉嫌「襲擊致造成實際身體傷害」，佢經已獲准保釋，8月頭再返差館報到。
警方初步調查相信，兩個人因為手推車碰撞問題起爭執。小記了解過，四眼仔已經出咗院喇。