日前白姐姐白韻琹第「N」次爆出離婚傳聞，今次更加係白姐姐自己於FB爆料在先，幾乎一字一淚謂「我痛恨自己相信一個狼心狗肺……」，又暗示因為購入豪宅TheAustin而令雙方關係生變化。

貼文當日，謝偉俊以「無聲勝有聲」回應同白姐姐關係，白姐姐於翌日晚上，接受nowTV節目主持梁思浩之邀任嘉賓。原以為會有堅料爆，點知出到嚟竟然係白姐姐帶住主持人遊花園。

節目中，梁思浩爆料話白姐姐一見到佢，就捉住佢隻手爆喊，仲表示廿幾年感情冇咗喇，嘩………點知白姐姐氣定神閒咁「解釋」番，佢喊，只係喊自己冇咗廿年青春；至於「家暴」，白姐姐話男方有出手打佢，但佢自己出手更重云云。成個節目，白姐姐封得滴水不漏，難怪梁思浩事後大歎自己戇居、邀白姐姐受訪。

梁思浩似是氣難下，於微博繼續謂: 「誰在我面前講大話，我都不會比(俾)面，罵你便罵你！管妳是白韻琹！請不要少(小)看我的智慧，也不要少(小)看我做電視主持的技巧！那在我面前講大話，我照罵，我管你是誰？因為觀眾只要真相！」