昨日賣地再現新地王，九龍塘義德道3及5號地皮以16.3億元成功賣出，每方呎樓面地價近1.8萬元，不但高出勾地價逾五成，亦打破毗鄰義德道1號地皮的成交呎價紀錄。原先以為志在必得的嘉里建設（683）居然被華懋截糊，令地皮能以大型綜合項目發展的機會減低，華懋究竟有何盤算？莫非所謂的單幢式精品豪宅都可以賣2萬幾蚊呎？
另一奇怪之處，是政府已經表明會大舉推出地皮供發展商競投，加上工業地都有可能放寬用途，發展商又因乜解究要咁高價搶地？無論如何，本港發展商一向極度精明，斷估唔會胡亂斥資數十億元投資，故此麪粉價居高不下，應該麪包價都好難跌，發展商計過條數點會做蝕本生意。
反過來諗，麪粉價高企，港府以外擁有最多地皮的公司，應數持有地鐵沿線物業發展權的港鐵公司（066），未知是否市場早已預料賣地成績好，昨日早上港鐵已經炒上，曾高見31.10元，收市仍升逾3%，而且成交額高近7億元，是多月來所未見，似乎有資金已睇中其貴重靚地。

持大量市區靚地

另一隻持有大量市區貴重地皮的上市公司是田生集團（8136），透過收購舊樓業權，田生近年不斷取得市區特別是港島絕無僅有的靚地，雖然不少是蚊型地段，未必能夠興建大型屋苑，但即使是以精品豪宅包裝，要賣8000至10000元一呎應該都無難度。
集團最近一宗成功收購行動是位於筲箕灣工廠街及教堂里一帶舊樓，據報已接近取得8成業權，而田生其實近一兩年已在筲箕灣及西環一帶收了不少舊樓業權，論港島市區靚地，可能無乜發展商多過佢，以上義德道地皮樓面地價每呎1.8萬元，田生潛力可能好勁都未定。田生昨日收報0.92元，微跌1%。
歐陽風