【潮店回歸】Foot Locker回歸開三層大舖 首天排隊安排惹鞋迷不滿
蘋果日報 2018/09/20 18:10
排隊潮流Jordan波鞋ajFoot Locker
Foot Locker坐落九龍公園徑1號，外牆設計非常有特色，隔幾條街都見到。
如果你係80後或更年長的鞋迷，一定知道Foot Locker曾經也在香港大展拳腳，但後來隨波鞋熱轉淡，就撤出了香港。不過近年波鞋潮流重生，呢間喺歐美都大把分店的知名波鞋連鎖店，終於回歸，喺尖沙咀開設3層巨舖，更同時帶來出名多特別款籃球鞋的附屬店「HOUSE OF HOOPS」。新店正式開張，作為鞋迷的記者當然要去潮一潮聖。
新店坐落九龍公園徑1號，單看外型已夠晒霸氣，外牆設計非常有特色，隔幾條街都見到。內裏裝修亦富特色，大大個locker用嚟暫存客人留起的貨品，更有黑人駐場DJ打碟，加上一大班有型店員，整間舖的氣氛都跟香港一般波鞋舖有所不同，更富外國潮味。當然喇，貨品才是主打，店內基本有齊各大品牌的潮鞋，種類頗多，記者更發現BB和童裝鞋比一般店舖多，潮媽潮爸唔好走漏眼。
今次新店開張，3樓的「HOUSE OF HOOPS」就帶來限量的AJ13和AJ14，引得不少鞋迷晨早走去排隊，其中一位健強先生我表示：「我返完通宵工即時嚟排隊，排咗一個鐘左右，都仲未入到大門口。」排隊人龍全都是排隊上3樓「HOUSE OF HOOPS」買AJ，入到門口都仲要逐層排隊，想買心頭好絕對不易。更令人沮喪的是，新店開10:30，11:15就已經宣佈AJ13已經賣晒，令唔少鞋迷相當不滿，記者更聽到有人怒罵：「排頭位嗰啲買完又買，買完又買，梗係賣晒喇！」記者之後亦嘗試了解，的確發現有人大手入貨，更聽到有攞住幾對剛入手AJ的人，疑似問相熟的店員：「仲有冇呀？」店員就答：「真係冇喇。」而實情係點，就有待進一步查證了。
除了排隊安排令部份鞋迷不滿外，店內運作亦似乎有待改善，記者聽到店內部份機碌唔到銀聯卡外，收銀處亦只有一人，令排隊時間頗長。記者自己亦想買少少嘢，有店員就話可以落一樓俾錢，但又有另一店員話唔得，雖然店員不少，但運作就有點混亂，希望日後會有所改善，更希望新店會帶來更多特別版波鞋，就真係鞋迷福音喇。
記者、攝影：韓繼聰
新店開張，3樓的「HOUSE OF HOOPS」就帶來限量的AJ13和AJ14，引得不少鞋迷晨早走去排隊。
入到門口都仲要逐層排隊，想買心頭好絕對不易。
新店開10:30，11:15就已經宣佈AJ13已經賣晒，令唔少鞋迷相當不滿，有人更投訴有人「買完又買」。
記者嘗試了解，聽到有攞住幾對剛入手AJ的人，疑似問相熟的店員：「仲有冇呀？」店員就答：「真係冇喇。」
排咁耐隊，都係為咗上3樓「HOUSE OF HOOPS」買限量波鞋。
店內裡裝修亦富特色，大大個locker用嚟暫存客人留起的貨品。
有黑人駐場DJ打碟，加上一大班有型店員，整間舖的氣氛都跟香港一般波鞋舖有所不同，更富外國潮味。
記者更發現BB和童裝鞋比一般店舖多，潮媽潮爸唔好走漏眼。
記者採訪完再遇上健強先生，他失望表示：「知道AJ13已賣晒，排一個鐘都係浪費時間，就當買個體驗喇，希望下次可以買到心頭好喇。」