現年73歲嘅白韻琹(白姐姐)，同59歲嘅謝偉俊(Paul)一段忘年戀早年不被外界睇好，但偏偏佢哋一齊生活已經29年，97年兩個仲結埋婚，名符其實老妻少夫。

雖然謝偉俊工作忙碌，但不時會孖住白姐姐行街食飯，甚至出外旅行。好似讀者吳小姐日前就透過《蘋果》嘅「爆相爆片」報料，話早前喺台灣桃園國際機場見到白姐姐同阿Paul搭飛機返香港，唔知白姐姐係咪盡興得滯，所以顯得倦容滿面。

吳小姐話:「我嗰日下晝4點喺桃園機場見到白姐姐同謝偉俊，佢哋喺入閘位置附近一間飲嘢地方飲嘢，白姐姐冇化妝，個樣睇嚟好攰咁。」吳小姐話見到白姐姐用紙筆喺度寫嘢，阿Paul就玩平板電腦，兩個似乎冇乜交流。

吳小姐話佢同白姐姐佢哋都係搭下午5時45分班國泰機返香港：「最神奇係我以為佢哋坐商務，但原來坐經濟艙，坐喺我後面。」吳小姐話佢哋同行仲有一個女性朋友，臨上機前白姐姐同個女友人去廁所，阿Paul就喺廁所門外等候同執嘢，等埋白姐姐出嚟先至一齊上機。另外，吳小姐話好多香港乘客都認得白姐姐佢哋，但就未見有人搵佢哋合照。

精選娛聞，喺晒《娛果》
http://fb.com/appledailyent