歌神張學友周日(25號)啱啱喺山西體育中心舉行巡迴演唱會，學友喺台上話如果仲有機會，十年後再見！事後有唔少fans喺微博留言大讚嗰晚嘅氣氛好好，好期待10年後，呢個約定兌現！

不過喺演唱會結束之後，有大陸傳媒報道話因為舉辦今次演唱會，搞到足球場嘅草坪損壞嚴重，而且亦清楚見到遺留咗唔少垃圾，事件喺當地引發唔少討論聲音，雖然體育中心話已經同主辦單位簽咗補充協議，將會喺7月1日前將損壞咗嘅草坪恢復原狀，不過體育中心表明今後對所有演出、活動進行嚴格審核，如果對場館設施設備有損壞嘅演出及活動一律唔批准舉辦，堅決杜絕同類事件再發生！咁講法，體育中心似乎有啲後知後覺。

事後網民留言有人覺得學友今次真係「躺着著也中槍」，有人覺得係觀眾質素問題，點解完騷走嗰陣，唔帶走自己嘅垃圾， 與此同時承辦商亦應該好好處理善後嘅工作，呢個場館已經唔係第一次舉行演唱會，點解偏偏今次發生呢啲事？甚至有人覺得開演唱會，預咗會對草坪有所損壞，如果真係要保護，就唔應該讓租俾人開騷，點解要喺完晒騷，收晒錢先責怪人哋呢？