唔少人都知，人稱四叔嘅恒地（012）主席李兆基對傳媒講嘢一向都準備十足，以便應付記者千奇百怪嘅問題，所以只係得財經版頭條講四叔，有啲到喉唔到肺。作為《蘋果》財經版讀者嘅你，今次有福喇，我哋將噚日記者會上四叔未完嘅故事，呈獻畀大家！
話說四叔失蹤咗一排嘅貓紙，噚日喺股東會之後嘅記者會上再度重出江湖，醒目嘅攝記哥哥二話不說，即刻影低咗，有圖有真相，呢個證據令華華可以將四叔講唔晒嘅重點，攞出嚟同大家分享。不過分享之前，事先聲明，四叔嘅貓紙係用密碼寫，有解碼嘅需要。

論特首　希臘唔掂香港掂

攝記捕捉到嘅，相信係貓紙嘅第二頁，第一句係「舊樓重建，我多過市建局」，呢句記者會都有講。尚未曝光嘅內容，係雷曼事件，根據貓紙內容，「好多樣都是香港最好（歐美不如），假如在希臘做特首好唔掂，香港就好掂。（香港）環境特殊，得天獨厚，曆（歷）年都有盈餘。」四叔大概想講：經歷咁多風雨，香港仍然係最好，包括個特首囉！
貓紙另一個題目係新畢業大學生買樓，話「迫他做業主及勤於工作」。之不過家啲樓貴到無倫，想上車都唔易，呢條橋未必行得通。仲有一部份貓紙連華華都睇唔明，有相為證，大家可以自行參詳一下，或者等下次四叔自己解密啦！

李華華
mailto:[email protected]