馬天佑前日喺英國地鐵發生恐襲後一小時抵達當地，展開佢喺英國同巴黎嘅時裝週之旅。香港時間今日凌晨兩點，馬天佑現身位於克勒肯維爾，出席BURBERRY時裝騷，同場仲有好友倪晨曦。

由於舉行地點距離爆炸地鐵站只有約40分鐘車程，馬天佑話今次係佢去睇時裝騷以來，收到最多電話一次，除咗唔同嘅朋友打電話俾佢，媽咪都打咗好幾次電話，叫佢事事小心，但馬天佑就話自己唔太擔心。佢話：「都有留意住新聞，咁一定唔想再有呢啲事（恐襲）發生啦！但都唔驚得咁多，而且今次行程都好忙，都唔會出去周圍走。」

雖然，馬天佑話佢自己唔太擔心，但佢話自己都要確保整個團隊都安全，尤其助手係女仔，佢話已經勒令對方唔可以一個人單獨行事。講番今次嘅行程，佢就話除咗睇騷，同品牌仲有其他合作，會喺當地影啲相。佢透露：「今次我叫咗幾位來自唔同地方嘅KOL一齊嚟英國，好開心呀，最鍾意一大班人做嘢，而我就係今次呢個Project嘅創意總監。」