由噚日起至禮拜日，喺港島東、中環、尖沙嘴至紅磡一帶上空，會見到一架直升機，吊住幅宣傳橫額飛嚟飛去，橫額寫住「嘉亨灣」三大隻字。發展商恒基地產營業部總經理張炳強話係全港首創。
蘭西計過數，呢個西灣河新盤，已經連續兩周密集推介，真係名副其實鋪天蓋地。
張炳強話，做直升機宣傳，淨係幅二千呎特製橫額，已經要成三十幾萬，未計三日每日租三粒鐘直升機費用。
售樓處噚日啟用，又安排大型舞獅，出動埋開篷跑車，貼晒嘉亨灣字樣巡遊，排場十足。
另外，為咗迎合唔同國籍人士，特別印製十二種語言嘅簡單樓書，每種三千本，包括中、英、德、意、法、日、韓等等。
發展商唔少友好噚日睇樓，好似嘉華呂耀華、新地陳秀賢，重有人見到東亞李國寶公子李民橋，由發展商陪同睇樓。

古迹招租
管理政府大批物業嘅產業署，時不時都將啲以前高官住過、又屬歷史建築物或古迹嘅貴重物業招租，啱啱又向城規會攞到批准，大潭水塘道盡頭、歐陸風格、評定為一級歷史建築物嘅宿舍，可以招標出租。
唔講語知，呢座樓屬於我哋伯爺年代，喺大潭篤抽水站附近，原為水務署高級員工宿舍，唔用之後，變成戒毒所，直到舊年，先至交番畀產業署。
由於對住成個大潭港，望山望水，景色一絕，產業署諗住將佢出租賺番啲。宿舍佔地萬四呎，除兩層高主樓外，重有一幢附樓，樓面逾四千呎，閒閒哋每月可以收番十幾萬租。