劉青雲﹑古天樂（古仔）﹑周迅及麥兆輝，今日出席灣仔EXPO舉行嘅《竊聽風雲3》發佈會，麥兆輝表示今次係終極篇，題材內容講房地產。

當介紹角色時，青雲就話：「呢套電影好神秘，要去戲院睇，今次演土豪惡霸。」古仔就話：「總之就要睇，我係半土豪半惡霸，又係打手。」周迅表示戲中飾演一位被土豪照顧及欺負嘅媽媽。

佢哋為電影海報造型揭幕時，青雲見到自己張海報就話：「好多皺紋，好似變成石像，啲人名流千古就係咁。」由於吳彥祖冇出席發佈會，但見到張海報有個位畫到一間間咁，周迅及古仔就笑吳彥祖係「鬼祟斑馬」。

青雲身形似乎發福，佢話之前去咗西班牙旅行，玩得幾開心，因為都係食嘢同周圍行，所以肥咗幾磅，問到係咪買好多嘢？青雲話：「我冇呀，好多嘢香港都有，都係賺個退稅，志在relax。」問到對新戲票房有冇信心？青雲話：「我相信呢個會好好，因為頭兩集已經打咗好好底，今次題材好特別。」

至於戲中角色有冇影射其他人？題材係咪敏感？青雲話：「冇呀，我覺得咁講，若然攞個subject大家都冇興趣，更係攞個主題大家覺得幾得意，多聯想力，比較吸引，我覺得選擇呢個題材好啱，唔覺影射，大部份地方好似東京﹑倫敦都有人炒樓。」

另外，青雲及古仔都獲今年香港電影金像獎影帝提名，兩人喺現場互笠高帽，互貼對方，青雲讚古仔喺《掃毒》演出有跳脫性，古仔就話：「我都係貼佢，有份投票，我投嗰啲係第一輪，青雲係靈魂人物，我呢個跳脫性格，都係多得佢指導。」周迅就表示男主角好難揀，好難做評審，又話想佢哋兩個都獲獎。