近日相信唔少人打開Facebook等嘅社交網站，都會無喇喇見到有4至6個黑人着住西裝，合力抬住一副棺材，然後跟住電子音樂舞曲起舞，場面詼諧得嚟又有啲突兀，所以迅速洗版而且被惡搞成唔同類型嘅「網絡迷因」（meme）。而近期爆紅嘅佢哋，最近隊長Benjamin Aidoo受訪時就自爆自己都係一個球迷，仲最鍾意球王美斯，好想見對方一面。

其實呢個「黑人抬棺」喺嚟自非洲加納嘅喪禮，早幾年美聯社同BBC都已經做過專題訪問，只不過近期有人加咗電子音樂後，又再一次喺網路洗版。隊長Benjamin Aidoo受訪嗰陣就表示佢都會問下客人想要傳統嚴肅嘅，定係要有埋編舞嘅熱鬧版本，Benjamin認為一個離開唔一定要搞到咁唔開心，佢喺世上都做嘅好多嘢留畀其他人，大家可以抱住一個慶祝嘅心態看待有人離開世界。

近期爆紅嘅佢哋都接受唔少訪問，最近Benjamin喺訪問提到，自己嘅足球偶像係球王美斯，「我最鍾意嘅球星就係美斯，我好鍾意佢嘅打法，仲要佢一啲都唔獨食，如果唔係佢巴塞一定贏唔到咁多盃。如果可以我真係好想去魯營睇波，同埋見下佢真人。」