近排股市焦點，非漢能薄膜（566）莫屬，一隻九成九生意靠阿媽、毛利率奇高嘅太陽能股，踏入羊年大發神威，噚日市值直逼四千億，一度超過長實（001），相信事前冇人會估到。漢能乃港股通十大成交常客，大陸資金含量極高，四日最多炒高一倍，完美示範強國人炒股模式。
漢能噚日由高位回吐，單邊升市好大機會結束，取而代之嘅係大型上落市，肯定更加難玩。要玩不如吼另一隻異動股阿里影業（1060），噚日成交打入廿大之餘，收市價計更係馬雲宣佈入股後新高，意味已消化大部份蟹貨，後抽守得住1.9元嘅話，有力再上層樓。

開達優質資產揸手

早兩日推介嘅卡撒天嬌（2223），三日炒高54%，財技派大勝而回，最新市值五億多啲，有貨嘅戰友可斬邊留邊放紙鳶。殼股又見異動，舊年底頻見資金炒作嘅開達（180）一棍破旗，值得關注。開達主要產銷玩具及模型火車，以及物業投資，手頭物業包括九龍灣開達大廈，有傳叫價達二十五億元，相當於市值近三倍，雖然公司已否認賣產，但賣殼機會卻不低，事關中期業績由盈轉虧見紅，持股近六成嘅主席丁午壽年逾七十。如果複製鱷魚恤（122）劇本，將資產與股價折讓收窄至七成，可見1.38元，潛在升幅四成！

唐牛
https://www.facebook.com/tongcow88