【李華華搶先睇】爸爸級股評人 父親節豐收
父親節藺常念沈慶洪蘇沛豐譚朗蔚
今日父親節全日落住雨,但無阻一班爸爸級股評人的親子樂,淨係收到仔女親手做嘅手工,已經夠開心。富昌譚朗蔚(Stevan)一家四口到迪士尼玩,順便慶祝4歲大仔生日,仲收到仔仔畫嘅心意卡,畫工雖然抽象,不過係爸爸眼中最無價,Stevan形容係「藝術情操好高」。
至於騰祺基金嘅沈慶洪(Patrick)一家人食中餐慶祝,6歲仔仔創意疊夠,用手掌印整咗張怪獸卡,一句「daddy's little monster」,冧爆爸爸。
招銀國際蘇沛豐(Daniel)個女得歲半,未識對爸爸有表示,但Daniel趁天晴一刻即帶囡囡落街玩,一樣開心。至於兩個乖女已經出晒身嘅股壇「開心果」藺常念(藺Sir)就有口福,一連兩日「食好西」,周六晚先同細女食意大利私房菜,噚日中午就到大女請食日本菜,藺Sir學埋後生仔個套「相機食先」,再post食物相上fb分享,見到都流口水。
Patrick六歲仔仔整嘅心意卡夠創意(受訪者提供相片)