【16:55】水務署預計今晚近8時完成維修
【15:16】九巴回應事件
【12:45】事件中2九巴、1城巴及1貨車損毀，1名九巴男乘客被玻璃碎鎅傷手自行到仁濟醫院求醫
【11:37】運輸署於上午11時29分宣佈：早前因水管爆裂而封閉的楊屋道往德士古道方向近荃新天地的全線現已解封。
【11:28】運輸署於上午11時12分宣佈：因水管爆裂，楊屋道往德士古道方向近荃新天地的全線現已封閉。

早上10時50分，荃灣楊屋道1號荃新天地對開一個水務署舖設鹹水管工地，慢線有工人正以掘泥車進行掘地工程，其間疑掘爆地下水管，大水有如「水炮」打橫噴出馬路外，有行中及快線的車輛慘被「水炮」打中車身，有貨車逆水而過，一部49X路線九巴亦行經上址，車長「勇字當頭」，竟「掂行掂過」，被噴出的水炮連同沙石打爆玻璃窗，大水沖入車廂，地面全濕，全車乘客非常狼狽。

乘客阿明由沙田乘49X九巴返青衣上班，豈料巴士到達荃新天地便遇上「水炮」突襲。「我攞定部手機出嚟拍低，諗住sent畀公司話要遲到。」他諗住巴士車長不會大膽駛過，「全車客滿，水柱係咁打埋嚟，直接噴向部車，有沙石連埋水柱撞埋嚟，就係咁撞爆咗玻璃窗！」他指巴士有數塊玻璃窗被撞爛。

阿明對車長做法大為不滿，「過咗水柱之後巴士司機叫我哋落車，話唔會有接駁車，叫我哋徒步離開，司機係唔應該過㗎，好魯莽！如果水柱向上仲好啲，但打橫直接噴埋嚟，成車人命梗要呀！」他指大水衝入車廂，成地濕晒，但幸好沒有乘客受傷。

警方指爆水管事件中，有2部九巴、1部城巴及1部貨車損毀，1名九巴男乘客報稱被玻璃碎鎅傷手，自行到仁濟醫院求醫。當局已關水掣，正調查事件。

九巴發言人回覆查詢時表示，今早約10時40分，楊屋道荃新天地對開有水管爆裂，兩架49X及41M線九巴駛經上址後發現左邊車身有玻璃爆裂。車長查問沒有乘客受傷後，協助乘客過車，兩架巴士駛回車廠修理。其後一名受輕傷的乘客自行到醫院治理，九巴已慰問傷者。

水務署表示，涉事水管為一條直約200mm的鹹水管，水務署接報派工人到場，大約上午11時58分關掉水掣，預計今晚近8時維修完畢，其間屋苑萬景峯的廁所水供應將受影響。

你敢爆，我敢獎！ 即Call《蘋果》24小時爆相爆片熱線 ：63836568