李亞鵬因為「書院中國」被指歛財被弄得頭大如斗，都未回氣又爆多單「嫣然天使基金」被指同民營整形醫院「一條龍」，都係嗰句……被質疑私相授受，善款蒸發。

李亞鵬、書院中國同嫣然天使基金均齊聲否認指控，王菲亦有轉發微博，以示支持；但與此同時，亦有傳王菲已經疊埋心水，力爭細女李嫣撫養權。

一曲《出路》盡訴王菲心聲，「我信佛，這有沒有幫助我試圖接近幸福可甚麼是幸福」，去年十月，王菲同好友謝娜等拉隊去咗印度，未知是否想向高僧參透佛理。家陣，正當網民為王菲擔心李亞鵬單嘢同大女竇靖童被指未成年就已經飲酒食煙仲紋身係咪太叛逆之際，原來王菲已經身在印度朝聖。

最近有網民影到聲稱係王菲喺印度菩提迦耶嘅正覺塔遇到王菲，盤咗個髻，戴上口罩。佢個口罩仲係紅鮮，同件衫好襯色。未知是否有伴同行喇。

其實早於本月4日，就有人上載咗一張王菲身在印度嘅相，寫道:「王菲參加今年的印度法會。」相中王菲穿上羽絨，與疑似友人一齊排隊攞嘢食。食物都係簡單清淡齋菜，但捧住隻碟嘅王菲笑容燦爛，知足，自能常樂。未知此道理，李亞鵬又點睇？