由韓藝瑟、金基石主演嘅MBC新劇《20世紀少男少女》，因受到MBC工會罷工影響，劇集延遲至下月2號首播。《20世紀少男少女》主要圍繞三個從小一齊長大嘅35歲女人之間嘅故事，集合愛情同友情嘅現實故事。

劇組搵咗其他年輕女星飾演韓藝瑟、柳賢慶、李尚熙嘅高中時期，當中飾演韓藝瑟學生時期嘅17女星康美娜，同韓藝瑟相當似樣，一樣眼大大，笑嘅時候會瞇起眼，神情似到足，獲觀眾大讚劇組選角選得好。而劇組就指：「想強調史珍珍一角就算長大咗，依然保留住年輕時期嘅單純，所以選角時都好努力搵與韓藝瑟相似嘅女星，想更有說服力地表現史珍珍嘅人生經歷。」

康美娜去年透過選秀節目《PRODUCE 101》女團版以限定女團I.O.I成員出道，活動一年後以女團gu9udan成員喺樂壇活動中，《20世紀少男少女》係佢首部演出作品。