行會成員羅范椒芬之前出席電台節目時，聲稱由「朋友嘅朋友」口中得知少女被誤導向示威者提供免費性愛，作為高官高調講埋啲未經證實言論，引起社會嘩然。但一班建制中人似乎都無汲取教訓，今日唔少記者朋友都收到經民聯立法會議員梁美芬傳嚟嘅一段短片，又有少女聲稱被示威者性侵，咁大件事八方當然第一時間搵梁美芬求證喇。點知，梁美芬竟然話自己「都係YouTube睇到，交咗有關部門跟進」，至於識唔識受害人，佢就無回應。

梁美芬今日廣傳一段YouTube短片，一個背向鏡頭、聲音經過處理、聲稱16歲嘅女士喺片中聲稱，喺朋友慫恿之下參與集會，希望識多啲人，「識到一班港大同中大嘅『學長』，佢哋話女仔就應該用身體安慰佢哋」，又話一次「散band」之後，同「學長」飲到無晒意識，就俾人拉上床。個女仔仲話，有時一晚會俾三個人性侵，更加受到暴力對待。

網民似乎好同情個女仔，唔少人都呼籲佢報警處理，有人留言話：「江sir話匿名會大大增加警方調查難度，不如少女講啦，我哋會好好保護你」；又有人留言叫少女報警還羅范椒芬清白。不過亦都有人質疑，香港人唔會講「學長」只會講「師兄」，片段有造假成份。八方就覺得，而家網絡發達，流言滿天飛，作為公眾人物有責任求證事件真偽，先至發放消息，否則真係會引起不必要恐慌囉！

-----------------------------

9.15民陣遊行

日期：2019年9月15日
時間：下午3時起步
起點：銅鑼灣東角道
終點：遮打道行人專用區

*獲反對通知書，民陣上訴失敗
-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港