嘩！中學宿舍400呎兼有煙花景呀！噚日八方去咗麥當勞道聖保羅男女中學睇樓，「新盤」係該校新宿舍，呢個豪宅區宿舍，校方估計月租要五六千元。

名校半山區宿舍共四層，有81個宿位，每間房面積約400呎，外接露台望到海景，學生打開4米闊嘅落地玻璃門，近望香港公園園景，遠望中銀、滙豐銀行鬧市景同維港海景，新宿舍明年初開放，應該趕及俾學生睇煙花。隔籬豪宅威豪閣，中層2,000呎單位呎價約2萬蚊，聖保羅學生真係用劏房價住豪宅。
宿舍有兩種房，三人或六人，三人房以樓梯式設計，一人一層；六人房分六張組合床，同DBS一樣。中五領袖生甘兆祺話，學生只能以宿營嘅短期租約住一陣，領導生有特權可以先住。校長陳黃麗娟話，宿舍優先畀香港冇屋企嘅優才子弟、外國交流生入住。