當年今日
關於我們

股壇瀏覽器:新輪登場 無助睇市

蘋果日報 2002/01/22 00:00


港股今周可以話係發輪周,噚日就有約40隻新輪發行,藍籌股反而相當淡靜。據發行商講,今次係暫停發輪後首次復市,所以頭威頭勢一定要做得好好睇睇,佢哋通常會打孖上,即Call輪與Put輪都同時推出,務求滿足客戶任何要求(包括睇淡、睇好、睇牛皮、睇波幅),費事同客對賭,所以後市仍會缺乏方向,發輪活動對後市去向冇太大啟示,要睇後市都係睇番美國經濟比較好啲。

新高準傳有動作
e莉莎話接到線報,最近有一班炒家已經收乾咗上市冇耐嘅新高準(690),可能會有所行動,至於幾時會開車則是未知之數。此股市值1.87億元左右,大股東與主要股東持股量合共約68%,公眾持股量市值約6000萬元,可以話係細細粒容易食。聽講該公司可能會發展一項新業務,將會大大增加日後盈利能力。
沉靜咗一段時間嘅肥佬黃最近又開始曝光,向外界介紹佢檔中國能源控股。佢話呢檔嘢一年營業額30億元,一年賺3億元。呢盤生意佢佔50%,即係話佢一年賺1.5億。阿虎心諗,若果肥佬黃咁掂,佢欠落銀行筆數應該唔使搞重組。不過,黑客話,喺大陸搵到錢唔代表可以運到落香港,如果佢呢檔生意搵到人入股,又或者可以上到市,肥佬黃就可以東山再起,至於佢仍然持有嘅星港地產(245)與遠生醫藥(140)能否有起色就好難講,因為自從肥佬黃俾證監盯緊後,已經轉移專注私人業務,星港與遠生易手後,佢更加唔理得咁多