香港桌球一哥傅家俊返嚟喇！今個球季成績麻麻嘅Marco周三係英國約克郡舉行嘅英國桌球錦標賽16強，以6:0零封僅21歲嘅英格蘭新星連斯，連續第三年殺入八強。就連Marco自己都話：「其實我都唔係打得最好，仲有一啲技術問題要改善。我今年確實表現唔好，希望英錦賽有個好開始。」
Marco係2016/17呢個球季，好多比賽唔係第一圈就係第二圈出局，暫時最好成績係喺上月中國錦標賽殺入八強，可惜最後輸畀前世界冠軍梅菲。
Marco喺今次英錦賽越戰越勇，除咗啱啱零封連斯之外，喺次圈都係派蛋畀英格蘭老將麥萊特。世界排名15嘅佢好需要好成績，因為如果跌出世界頭16位嘅話，分分鐘連下月中只有世界排頭16位球手可以參加嘅大師賽都去唔到。

火箭第847次破百晉級

至於奧蘇利雲就喺另一場16強以6:2擊敗威爾斯嘅史堤芬斯，順利晉級八強；而「火箭」喺今場打出一cue 101度之後，更加將職業生涯單桿破百嘅總次數刷新至847次。同日舉行嘅兩場「英中大戰」都由東道主球手贏波，梅菲以6:2擊敗周躍龍，而沙比就以6:1勇挫張安達。（now637台今日9:00pm直播）