16歲喺台灣出道，至今已經十年嘅雙胞胎女子組合By2，來自新加坡嘅姐姐Miko同妹妹Yumi當年以雙胞胎身份配上清純可愛形象出道，擄獲咗唔少少男嘅心，不過近年兩人改變形象玩成熟美艷，同過去反差極大。

日前Yumi喺IG自爆去按摩時遇到色狼，雖然佢冇話喺幾時邊度，但係明顯心情受影響嘅佢噚晚再次喺IG話：「我本來不想說，忍住就過去了，但是這幾天出差都睡不着，終於去報案了。」

其實今次都唔係Yumi第一次被性騷擾，上年Yumi就曾經喺網上話，自己同姐姐Miko喺新加坡健身房被幾個男教練偷拍及整蠱：「人與人之間是要互相尊重的，徹底的失望在自己家鄉居然發生這種事，只能跟這家健身房說掰掰了。」

一對雙胞胎靚女組合，緋聞傳聞當然唔少得，曾經因為兩人同出道時形象有太大分別而被懷疑整容，當時兩人仲推鼻證明清白。而感情方面，妹妹Yumi曾經同賭王公子何猷君拍拖，不過兩人因「價值觀差太多」而分手，事後佢用「爛桃花」嚟形容呢段感情。

精選娛聞，喺晒《娛果》
http://fb.com/appledailyent