當年今日
關於我們

【休息叉完電】喬妹夥拍朴寶劍拍新劇?

蘋果日報 2017/03/09 18:15

雲畫的月光朴寶劍宋慧喬孔劉

憑韓劇《回答吧!1988》及《雲畫的月光》上位嘅男星朴寶劍,早前喺亞洲各地舉行巡迴粉絲見面會,將於後日喺韓國首爾舉行尾場。據知完成最後一場見面會後,朴寶劍將會考慮拍攝新劇。
而今日韓國方面有消息指,韓劇《Doctors》編劇河明熙作家嘅新作《愛情的溫度》有打算搵朴寶劍演出,不過朴寶劍方面就冇透露到底係咪考慮嘅作品之一。除咗有傳河明熙作家屬意朴寶劍演出外,更有傳韓劇《太陽的後裔》女星宋慧喬擔任《愛情的溫度》嘅女主角,不過喬妹方面就立即否認演出消息,稱連《愛情的溫度》嘅大綱都冇睇過。
《愛情的溫度》係河明熙作家嘅小說作品,將由佢親自改為電視劇本。小說以1994年做背景,講述幾名年輕人透過當時流行嘅匿名聊天室成為朋友,其後男女主角見面,發展愛情糾纏交錯嘅故事,而劇集預計於今年下半年播出。
另外,近日韓國有網上問卷調查公司以「白色情人節最想收到邊位男/女藝人嘅糖果?」為題,向4,000名20代至40代嘅女性及男性進行問卷調查,結果顯示朴寶劍以16.5%得票率排第2,不敵近期爆紅嘅男星孔劉(22.7%),其同門師兄宋仲基憑10.6%得票率排第3名。