當年今日
關於我們

【李八方online】囚友怨雞翼大細不一 8格廁紙唔夠用 譚文豪諗計幫手

蘋果日報 2019/03/14 14:45

李八方ONLINE雞翼譚文豪囚友大使

「燒雞翼,我鍾意食」,唔知大家身邊有冇雞翼控,每見雞翼就會發狂?但好明顯,雞翼都有大細之分,如果睇見人哋拮住嗰件大大隻、自己嗰件就瘦奀奀,相信都會幾唔開心。有在囚人士就同NGO反映,話監倉分發嘅雞翼,成日大細不一,如果分到件細嘅,真係唔多夠食;而監倉限定大時大節嘅晚餐先有雞髀食,囚友覺得唔多夠喉,公民黨立法會議員譚文豪臨危受命,已經透過預算案開支提問,掀起一場監倉「雞翼革命」。
政府各部門準備緊回覆議員有關預算案嘅開支提問,據知譚文豪今年就做咗囚友大使,接連提問囚友權益,由飲食同如廁再到探監問題,佢都一一關注,其中有兩條向懲教署嘅提問,成為當中亮點,包括要求政府增加撥款,令所有在囚人士每逢有雞翼嘅飯餐,都由一份雞翼改為兩份,同時將大時大節晚先有雞髀食,增加至每星期都總有一餐雞髀宴。
民生無小事,食雞翼自然係大事,譚文豪話係有NGO向佢反映囚友意見,所以代佢哋發下聲,覺得相對政府啲大白象工程下下都億億聲,加多一隻雞翼又使得幾多錢吖?譚認為政府絕對可以負擔。而一旦政府say no,佢話至少都要解釋點解啲雞翼有大有細,係咪批次不同、抑或撈亂批次嚟分派?斷估無理由誇張到有啲派雞中翼、有啲派雞全翼啩?
食完飯有咩做?唔使八方講,大家都知喇,譚文豪都好細心,關心埋囚友嘅如廁問題。佢問及署方能否增加撥款,令在囚人士每日可使用唔少於平均16格嘅廁紙?因為囚友意見係,依家每日平均8格真係唔多夠用。佢亦都問緊政府可唔可以考慮提供中醫服務,並叫政府增撥資源擴建探監室,同埋增加探訪時間同次數,估唔到譚文豪由上空到監獄,佢都一一關顧到。

-------------------------
《蘋果動新聞》訂閱新世代,4月開始免費訂閱,現在接受登記!
http://bit.ly/2Ja3IXw
-------------------------
全港打工仔特約:Lun廚動腦Q
加開1:30pm
3月11至22日
星期一至五1:30pm 10:30pm
http://bit.ly/2IZA8Ef