18年前年僅3歲的小柏林（鄭柏林）憑港台劇集《親親孩子天》一炮而紅，歌影視三棲忙得透不過氣，更與周潤發及劉德華等紅星合作，甚至在戴安娜皇妃生前訪港時向她獻花，風頭一時無兩，但他對娛樂圈卻毫不眷戀。今年便大學畢業的他，立志除暴安良，早前更已投考督察，大家將來若看見穿上警察制服的柏林，千萬別以為是在拍戲。

八、九十年代家喻戶曉的童星小柏林，轉眼已長大成為身高1.7米、體重130磅的大男孩，現年21歲的他，目前正修讀香港大學生物科技課程，今年6月便正式畢業。過去不少童星長大後，多會挾小時候的知名度重投娛樂圈，但小柏林卻另有打算，已投考督察的他，一心加入警隊為市民服務。
柏林早前已順利通過督察考試第一關，由於要同時準備督察考試和大學功課，分身不暇的他只能透過電話接受記者訪問。猶記得柏林小時候曾揚言長大後要當醫生，何以現在改變主意？聲音越趨成熟穩重的柏林解釋道：「我係一直想做醫生，但考試成績唔夠好，讀唔到醫科，𠵱家我大學讀緊嗰科，自己又興趣唔大，我一直有參與聖若翰救傷隊，喜歡幫人，做醫生同做警察一樣都係幫到人，所以咪投考督察囉！」

退出幕前
「拍咗十幾年做到悶」

提到不少童星長大後均做回老本行，但柏林對多采多姿的演藝生涯毫不眷戀，他說：「我三歲入行，都拍咗十幾年，幾乎乜嘢都試過，冇乜大興趣，可以講話做到有啲悶悶哋，既然搵到其他興趣，咪擺啲時間喺其他方面。」
柏林本來有400多度散光和300多度近視，為符合投考督察資格，他去年11月特地花了2萬多元，到養和醫院接受激光矯視手術，可見他對考試何等重視。問到信心如何時，柏林笑說：「一半一半啦！今次考試要求都幾高，要過五關斬六將，先考筆試，測試中英語文能力同推理，我第一關pass咗之後，再第二次面試，包括個人演講同小組討論等等，仲未知呢關及唔及格，如果及格嘅話，先至到finalinterview考體能，我屋企人都好支持我。」
在娛樂圈工作了十多個年頭的柏林，97年入讀中學後，幾乎已停止一切幕前演出，兩年前入讀港大時更索性入住宿舍，展開多采多姿的大學生活，一切一切，似在彌補當年失去的珍貴童年生活。問到身邊同學會否因他曾經是童星而投以異常目光時，柏林說：「其實都唔係太多同學認得我，就算認得嗰啲，頂多只係問幾句，冇乜特別唔同。」

掛念發哥
「好多哥哥姐姐錫我」

感情方面，柏林一度以問題太過私人為由婉拒回答，後幾經追問，他才說：「都有拍過拖，但𠵱家冇啦，𠵱家我只係想畀心機讀書同考好督察個試。」
未知身為90年代當紅童星的他，可有留意近年表現較突出的小演員？柏林說：「大學生活好多嘢玩，所以近年我冇乜睇電視，冇乜特別留意。平日嘅我，其實同一般年輕人一樣冇乜分別，都係鍾意打籃球、打遊戲機、睇戲聽歌咁，但冇乜特別鍾意邊個明星歌星。」
雖然不稀罕做明星，但柏林偶爾也會緬懷當童星的日子，柏林說：「好多合作過嘅哥哥姐姐都好錫我，好似周潤發同劉德華咁。不過我覺得𠵱家藝人冇乜私人空間，成日俾狗仔隊跟，壓力又大競爭又大。」不過柏林強調自己不再踏足娛樂圈，並非害怕壓力和競爭，而是對這個行業真的感到厭了、倦了！
採訪：戴彩煥
部份圖片提供：鄭柏林

鄭柏林

年齡：21歲
學歷：就讀香港大學生物科技課程
出道經過：2歲多時獲賞識拍廣告，其後接拍港台劇集
成名作：港台劇集《親親孩子天》
威水史：90年憑電影《愛的世界》奪亞太電影節最佳童星獎