金像影后茱莉亞羅拔絲（JuliaRoberts），自從喺上年十一月生咗對龍鳳胎之後一直深居簡出，唔少狗仔隊為咗影到茱姐對孖B嘅照片，一直駐守喺茱姐位於新墨西哥州嘅屋企外面，搞到佢不勝其煩。有見及此，茱姐日前向《People》提供咗一張佢同對寶貝仔女嘅大頭相，據講呢輯相重係茱姐個攝影師丈夫丹尼慕達（DannyModer）親自揸機㖭！
三個月大見Fans
茱姐喺上年十一月尾剖腹誕下囝囝費拿斯華特（PhinnaeusWalter）及囡囡希素柏翠茜亞（HazelPatricia）後一直冇公開露面，為咗畀所有fans見吓一對從未正式曝光、啱啱滿咗三個月嘅孖B，茱姐日前特登叫老公丹尼喺屋企同費拿斯華特以及希素柏翠茜亞影番輯靚相，喺張相入面，薄施脂粉嘅茱姐抱住一對戴住白色小冷帽嘅BB，只見喺右手面嘅費拿斯華特睡眼惺忪，而B女希素柏翠茜亞更加瞓着咗！