去年梁芷珊跟前夫羅傑承結束15年婚姻，回復單身的她，現與法籍混血廚師Olivier拍拖，再墮愛河需要一份勇氣，原來芷珊大男友11年，衝破年齡關口更加要勇氣。

「我識佢好耐，去餐廳廚師會出嚟傾偈，但交換電話係朋友飯局。其實如果客觀分析，我哋有好多問題，我成世人都未試過同外國人拍拖，後來知道佢係法國同德國混血，可能比較理智同感性，我都係呢類人，大家諗法好夾，但亦都有非常唔夾地方，大家文化差異；我又大過佢，我從來未試過同大過佢嘅男仔拍拖，我大佢11年，真係好似王菲同霆鋒咁，我冇諗過！」男友原來亦曾離婚，有一名10歲女兒，兩人同是天涯淪落人。

舊愛練海棠、前夫羅傑承都比芷珊大10年、9年，從前的戀愛對象都是成熟男人，芷珊說：「我成日都諗，我依家49歲，當佢（Olivier）49歲時，我60歲喎，得唔得㗎？我唔想嘥佢時間，男人30幾歲黃金期，發展自己事業，又攞咗香港身份證，佢想喺呢度落地生根，我唔知我會唔會有日、或者55歲會性情大變呢，得唔得㗎究竟？

「我成日覺得唔得，跟住佢話：『點解你會咁樣？未試就話唔得？』我話：『唔係，我乜嘢都試，以前冇覺得有嘢唔得。』佢話：『係囉，點解你遇到我會覺得唔得呢？我覺得得喎。』」

男友給予足夠信心，兩人終於在一起，芷珊說：「我好欣賞佢好多嘢，工作獨當一面，同佢一齊令我有正能量。有時就係咁，喺某啲時間遇到某啲人，要相信仲係得嘅。佢話覺得我合眼緣同靚，最鍾意女人能幹，佢覺得好吸引，同埋佢話特別鍾意亞洲女性。」

剛過去的父親節，芷珊帶男友返娘家：「第一次帶男友同屋企人食飯，我喺杏花邨長大，同男友講，呢間係我以前間房，佢問：『呢度點擺到你啲鞋？』我話：『當你冇地方，就唔會有咁多鞋。』人係能屈能伸。

「我諗到自己出身，嚟自普通屋企，之前住公務員宿舍，之後華富邨，以前成日覺得自己好好彩，比其他人順利，但比上不足比下有餘。」

想到十年後這麼長遠，是否希望再婚呢？她說：「唔係，因為我拍拖關係好長，同羅生15年，對上一個男友10年，再之前係練生，女人諗嘢好簡單，冇理由感情玩一兩年。」

撰文：余燕儀
攝錄：廖達燊
攝影：沈健程
場地：Spark Bar & Restaurant

精選娛聞，喺晒《娛果》 http://fb.com/appledailyent