高級公僕退休後馬上加入地產集團，因為未過冷河，引起社會些少爭議。公僕說這是出於誤解，這種解釋，官腔得牽強，未能釋除公眾疑慮。於是乎，大老闆出來澄清，金口證實，本集團人才濟濟，人力物力多到使唔晒；地產這一瓣，唔需要問阿邊個，問阿邊個都無謂！
大老闆點名，對外公開表態，雖然人工唔低地僱用你，但地產超級大項目，唔使亦唔輪到你理，問你都多餘！對一個野心勃勃心計周密預備瞓身大展拳腳叫老細刮目相看的員工，等如兜口兜面摑了大個耳光。照鏡，左臉青腫，不過不會扁嘴頓足，還會別個右邊臉，細聲問老細，不如加大力度，犧牲小我冇所謂喎，打埋這一邊啦主席。

打工唔易，這一課，活生生教曉下一代，做大老細的貼身跟班，自尊心重過30g的，可能都會忍不下這口悶氣，劈炮好耐。今時今日的環境，不屑服侍老闆，不肯為了幾個零頭的年薪，做人肉按摩機器的打工一族，注定浮浮游游，難有出頭天。
退休高級公僕有長糧吃，依然要「馬住」大老細，跟出跟入拉櫈斟茶，可見世界艱難，銀行戶口固定收一份長糧，都仍覺肚空空，周身骨質疏鬆。高級公僕尚且嚴重缺乏鈣，不良於行只能爬，普通打工仔更加無力企硬。有見及此，我問阿仔老竇，會不會為了阿仔的書簿費擦老闆鞋。他說不會，叫阿仔自己擦好了。「兩害取其輕，索性訓練阿仔三歲就去打劫銀行。」我認真的，「不過要教識他，不要拿低殘的美金，至緊要心繫家國人民幣。」