迷離司機載女客 笑住炒上防撞欄
的士掛崖 生死差一米
【本報訊】一輛的士懷疑行錯路,昨晨載着一名女乘客駛至石硤尾歌和老街橋面時,報稱閃避車輛失控鏟上路壆後飆前八米,傾斜擱於防撞欄上,僅差一米便飛墮60米下的油站,驚險萬分。嚇至腳震的女乘客要由路經駕人士救出,事後與肇事司機一併送院,女乘客指司機當時精神呆滯,「以為佢瞓着咗,叫佢佢喺度笑,哈哈哈!好似唔正常咁」。
記者:簡明恩 梁澤岡
涉事司機姓曾(38歲),叫「阿超」,由小巴司機轉行駕駛的士數年,他事後接受警員酒精呼氣測試證實並無飲酒,亦無藥駕迹象,警方正循其精神狀況等方向調查意外原因。其母探病後憂心忡忡稱:「我都唔清楚乜事,佢平時都有啲心神恍惚,要做個詳細檢查先知……」
撿回一命的女乘客小青(45歲),來港定居已11年,現任職雜工,育有一對子女,她撞傷胸口,經治理後已經出院。她憶述事件仍猶有餘悸,「我腳都震晒呀……佢咁樣揸車累死我呀,我自己死咗唔緊要,我啲仔女冇媽媽㗎!」篤信佛教的她事發一刻不停念「喃嘸阿彌陀佛」,她亦相信手戴開光佛珠才受神靈庇佑:「呢個(佛珠)保佑我,我先大難不死,有法師開咗光嘅。」
事發於昨晨10時許,小青在旺角截乘阿超駕駛之的士往新界,但啟程後不久,小青發現自己身處九龍塘,路線明顯與她平時乘車路線不同,於是向司機提出質疑,「我問佢係咪我講得唔清楚,佢話冇問題,收少我啲錢」。但小青強調並非金錢問題,自己當時的確十分趕時間,遂詢問司機半小時能否抵達目的地,阿超亦回覆沒問題。
未幾,的士駛至澤安邨對開歌和老街往呈祥道支路的橋面,小青稱當時見司機攤坐司機位上,並非看着前方,前面又有一輛大貨車,她慌忙查問,但司機只是儍笑「哈哈哈」,而的士此時即告失控,鏟向左邊防撞欄,衝前八米後才停下。全車向左傾斜擱於防撞欄上,差一米便飛墮60米護土牆斜坡下的大埔道油站,「以為佢瞓着咗,叫佢佢喺度笑,哈哈哈!好似唔正常咁,我想落車,跟住就撞!」
意外後因的士右邊車身被升高離地,小青被困無法下車,於是立即用手機報警,但又說不出確實地點,慌張下即打開車窗向路經駕駛者揮手求救。其後一輛私家車駛近,三名青年下車將她扶落車,及向接線警員講出意外地點,脫險後她向阿超查問傷勢:「佢瞓喺度,又唔應我,淨係不停搓手心。」最終阿超由消防救出,的士稍後由吊臂車吊回路面,再由拖車拖走檢驗。
有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange