【李八方online】廠商會吳永嘉加盟 經民聯成立會第二大黨
吳永嘉林健岳李八方ONLINE盧文端經民聯
工業界(二)議員吳永嘉(右一)會加入經民聯,佢喺今日嘅經民聯6周年晚宴度,同其他經民聯議員合照。袁志中攝
商界政黨經民聯今晚(11日)舉行6周年慶典兼晚宴,仲公佈咗重大消息,就係代表廠商會進入立法會嘅工業界(二)議員吳永嘉,加盟經民聯,意味經民聯喺立法會中,將會有8個議席,成為第二大政黨。新加盟嘅吳永嘉今晚非常落力,喺酒會上好積極招呼賓客,經民聯議員合照嗰陣,佢亦有份一齊。
吳永嘉嘅外父、前全國政協委員盧文端,今日亦有出席酒會,盧文端向八方話自己年紀大,好少出席酒會,今日係特意支持吳永嘉,又話自己都好開心吳加入政黨,認為經民聯嘅工商背景,同佢好配合咁話。
經民聯監事會主席林健岳喺致辭時,正式宣佈吳永嘉加入經民聯,仲會擔任副主席,岳少仲即場為吳永嘉送上經民聯徽章。吳永嘉話,自己一直同經民聯有合作,認為雙方理念接近,相信加入經民聯,可以學到好多嘢,又話加入經民聯後,會同經民聯一齊支持特區政府依法施政,共創美好未來喎。
經民聯生日會節目一籮籮,一班青委包括監事會主席林建岳千金林顥伊等,齊齊用環保物品打鼓,仲請到陳潔靈(Miss Chan Chan)演唱《千個太陽》,現場咁多達官貴人,本身就係明星嘅Miss Chan Chan都忍唔住,落台同一班影緊佢相嘅高官selfie,佢仲開口搵特首林鄭月娥合照,睇嚟十分陶醉歌聲嘅林太即時「長官」上身,自嘲「有啲權威」,叫班高官快返坐低聽歌,生日會突然變咗訓練班。
去年特首林鄭月娥出席民主黨黨慶捐出3萬蚊引起全城熱話,仲傳出有建制派嬲嬲豬不滿林太「大細超」添。唔知係咪要洗脫「污名」,林太今晚為咗賀經民聯賀生日,竟然上台大開金口,同一班經民聯領導層高歌一曲《獅子山下》,大會見反應熱烈,請晒在場一班問責官員上台合唱,即場叫人捐款,台上嘅恒地副主席李家誠都答應捐200萬元,連同其他捐款,例如前全國政協常委陳永棋、全國政協常委譚錦球、旭日集團董事長楊釗等一人捐200萬,娥特只係幫吓口唱嘅《獅子山下》就籌到1,200萬元。
其實現場都唔係好聽到林太嘅聲音,可能係林太嘅「權威」有啲料到,近乎「咪咀」都為經民聯籌得過千萬,唔知有冇其他黨派又眼紅呢?
特首林鄭月娥、3名司長及多名高官都有出席經民聯6歲「生日會」。