43歲陳奕迅（Eason）昨晚在台灣金曲獎獲最佳國語男歌手，成為史上首位三度封王的香港歌手，今晚近7時，凱旋返港嘅Eason風騷現身機場，獲歌迷送上香檳祝賀。Eason表示：「雖然第三次攞呢個獎，但正式嚟講，自己係第二次親身到現場攞獎，好開心，其實冇諗過得獎，之前仲問經理人，如果萬一攞獎，使唔使準備致詞？經理人話今年機會唔大，所以攞獎好愕然，如果有期待而冇獎反而失望，所以依家好輕鬆。」

問到得獎係咪喜出望外？Eason話：「當時都未識得開心，慢慢上到台先認知係現實，開始亂嚟啦，又想唱歌，不過提詞機話我超時。」講到成為史上首位三封歌王嘅香港歌手，Eason笑說：「自己睇番，原來真係幾勁喎，不過唔止香港歌手，之前殷正洋提名三次更三度攞獎，反而我命中率只係得三成，因為我提名過九次，不過提名九次已經好勁。」

講到首輪投票已勝出，Eason表示：「其實自己好被動，冇諗過第一輪係咪高票數，唔會覺得自己特別叻啲，反而戥Jerald提名最佳製作人高興，因為香港人去到台灣，被台灣音樂圈評審入圍，我已經替佢好高興，呢隻碟係香港人製造，喺土瓜灣做mixing，覺得好自豪。」

至於《C'mon In~》攞埋年度專輯獎，Eason話最初覺得好奇怪：「因為呢隻碟冇攞最佳專輯，我一直認為攞最佳專輯獎先有機會攞年度專輯，所以覺得徐佳瑩會攞呢個獎，後來了解才知入選幾百隻唱片都有機會角逐年度專輯。呢隻碟大家都好用心，一隻香港人做嘅大中華唱片可以喺台灣攞獎，好有代表性。」

問依家係咪返屋企？Eason笑笑話：「係呀，落機睇ig，阿徐話斬咗料，唔知係咪為咗賀我，定賀阿囡考完試呢！」講到幾時再開演唱會？Eason話想做一個做足準備嘅演唱會：「依家構思中，最快都要2019年，當然想準備到八、九成先申請場地，之前演唱會都巡迴咗三年零三個月，先做咗135場，嘩，學友真係好犀利，用年半時間已經做咗超過135場。」想唔想同學友睇齊紀錄？Eason坦言：「冇必要，學友真係太犀利，其實做巡迴真係好辛苦，要好多體力。」

精選娛聞，喺晒《娛果》
http://fb.com/appledailyent