郭志怡（Bonnae Gokson）來自香港品味尚流第一家庭。
出身自永安百貨名門望族，創辦人之一的郭順就是她的爺爺。
家姐是時裝女王Joyce Ma。

Bonnae在80、90年代跟隨家姐的時裝王國Joyce做買手打拼16年，之後出任Chanel亞太區形象總監4年後，終於以個人的事業出發，轉戰搞飲食，在中環開名食店SEVVA、精品蛋糕店Ms. B CAKERY，當中如藝術設計的精品蛋糕獲得國際名譽，如《New York Times》就以「Queen of Cakes」來形容她，去到不同範疇，都是生活品味的指標或創造者，早在業內已被認定是Style Icon、Lifestyle Diva的地位。

品味，如何煉成的？對Bonnae來說，自小受家人的薰陶、家姐Joyce Ma都是她的mentor，正如她口中所言，她是來自大宅門的家庭：「我覺得我好幸運，我喺一個好好嘅家庭長大，媽媽好骨子，廣東人喺上海住，我長大係一個過程，間屋又大，工人又多，好多時請客，我細細個見好多嘢，好大場面，嗰時同幾房人一齊住，食飯有一個大飯廳，有人客嚟就開大飯廳，係大宅門出身，花園好大，兩層。我喺赤柱大，有啲石階落去沙灘，實情係一間別墅，我爹哋、媽咪、姑姐、阿嫲，我哋經常都有entertain佢哋。家姐大我好多，佢係big sister，係我mentor in my life，但係我唔可以唔講我媽咪，佢由細至大，教我靚嘅、好嘅、咩係骨子、禮貌。我媽咪靚慣、骨子到着長衫，啲鈕都要鑲玉石，我由細個佢已教開我。」

在她的身上，可以看到品味無遠弗屆，由時裝、餐飲、酒店顧問，做精品蛋糕，自言愛吃及懂吃的Bonnae在Joyce年代，成為Joyce Café的主腦，亦開啟了與美食的一扇門。在10年前，她選擇創辦自己的餐廳，背後有一個故事，就是捨棄引入當時還未在港開舖的法國甜點名牌餐廳Ladurée，這份情意結令她做了一款以法國瑪麗皇后的蛋糕致敬，成為餐廳的生招牌，之後不少美麗的蛋糕不斷出現了，她笑言：「實情我都唔識整餅，靈感我好快脆有，我行一條街，去吓深水埗，乜嘢我都有靈感，我創作力好強，但我師傅就慘，因為我唔識整餅，我要靠我啲師傅，我啲師傅咁努力，有咁多年經驗，我覺得我哋可以一齊夾，我有我隻眼，同我個腦，師傅有佢嘅手工，我畀過太多難題佢哋，想要呢樣，想要嗰樣。」

在Bonnae設計的蛋糕中，蝴蝶不時成為素材，反映她愛美的天性：「蝴蝶實情係我business symbol，唔係represent我自己、鍾意蝴蝶，係覺得好合襯，蝴蝶生命幾短，我哋係唔落preservative，我哋啲餅第二日唔食已經麻麻哋，生命好短，蝴蝶咁靚，你google有好多，係最靚最短暫。」

五年前，即2014年，她的身份再加多一項，就是作家，她以精品蛋糕，出了一本《Butterflies and All Things Sweet》，圍繞她在香港、澳洲的成長故事，如中秋節的燈籠、雀仔街的雀鳥、街邊賣的白蘭花、香港人的金錢主義、到她澳洲後花園的繡球花等，都可以成為她做蛋糕的靈感，她表示：「我想講畀你聽我喺香港嚟，好似我喺澳洲長大，喺花園有好多Hydrangea呢類繡球花，我就做一隻餅講自己童年、我細細個，屋企好多party，令我想做屋企party主題。」有深厚時裝底的她，出書也有着做時裝的神韻，她的創意團隊來自澳洲，曾幫《Vogue》做美術及攝影的班底，大膽以黑朱古力蛋糕為封面設計、布質料的內頁，都是有着時裝的追求完美的個性，這本debut之作，在法國、美國及澳洲三地拿了設計獎。

上年，她再出新書，以婚禮及精品蛋糕為題的《Weddings, Butterflies & The Sweetest Dreams》，用了兩年籌備此書，自言每一次都當是最後一次出書的她，認為再出書不只是一本「餅書」，是想帶出慶祝的訊息，她笑言出這本書的靈感是來自影星George Clooney婚禮的反面教材：「喺威尼斯乜都影得靚到死，點知出隻餅係咁嘅樣，又硬又粗，嗰時我已經成日玩instagram，見到靚嘅婚紗，會拼吓自己嘅結婚餅好唔好睇。我心諗，可以用呢啲情景做一本書，呢本唔係餅書，係講慶祝，唔係講結婚，亦唔係做一個catalogue，係想睇世界各地點慶祝。有啲人結婚係簡單，去沙灘就可以影一張相，搭巴士又可以一張相。」此書走訪法國、印度、日本等世界多地的婚禮，有婚紗女王Vera Wang、97歲高齡的時尚婆婆Iris Apfel為新書寫前言，Bonnae自言幸運：「我20幾歲識Vera Wang，佢總係wedding gown皇后，Iris Apfel係舊年嚟香港識嘅，4、5日就講一次電話，大家都見過好多次，佢好鍾意我嘅創作力，我又好admire佢嘅創作力。」

採訪：梁錦雯
攝影：周樂恒
攝錄：郭賢興、林德雄

精選娛聞，喺晒《娛果》
http://fb.com/appledailyent

每晚送5萬！
星期一至五晚上10點半《動腦Q》Let's Q the money！
http://bit.ly/2QW8LcI