當年今日
關於我們
隔牆有耳:怪醫自誇沙田張學友 - 李八方
蘋果日報 2011/09/15 00:00
張學友上身嘅騮哥,據講事前花唔少時間練歌。
醫學界立法會議員「怪醫」梁家騮結婚,前晚喺洲際擺成50圍,騮哥係中大醫學院首屆畢業大師兄,馬料水榮譽出品,因此中大醫學院空群而出到賀,院長霍泰輝坐足全場,港府醫護高官亦總動員,衞生署署長林秉恩帶隊,譚麗芬、曾浩輝齊齊撐場,行會召集人梁智鴻好早到,八方見唔到食衞局長周一嶽。
婚宴女司儀叫新人合巹交歡,兩人無咁開放,合巹交杯就算,全埸爆笑。平日不苟言笑嘅騮哥,娶得靚老婆風騷到極,開金口連唱三首歌冧老婆,《分分鐘需要你》、《你的名字我的姓氏》同《真情流露》,騮哥自誇係「沙田張學友」,在場好多中大人聽到即時抗議,事關論歌喉,騮哥勉強入流咋!
醫管局主席肥胡,噚晚帶住梁栢賢滿場飛搵人飲酒。肥胡指騮哥多年前高位200幾蚊沽出滙豐,籌錢同醫管局打官司,若果唔興訟,可能早啲有錢娶老婆。多個議員都有到賀,八方見到林大輝同肥胡咬耳仔密斟,傾乜?心照啦。